Leif plattdüütsch' Frünn',
nu hett de Harfst sik dörchsett - kolt sünd de Nächte nu all un mach sien, ji hebbt Lust un Tied juuch n'bäten up uns Netsiet rümmer tau driewen. Hüt schrifft juch hier Thomas Naedler ut dat Lannesfunkhus in Schwerin.
Mach ok sien, dat ji an juch Frünn' denken deit, dat ji mal wedder ne Naricht schickt an de, de ji lang nich seihn hebben. Un mit de tauhop könnt ji denn glieks mal rinner kieken in dat niege Bauk von Annie Heger un Yared Dibaba. Dor geiht dat üm Fründschaft un dorüm, woans ein de plägen möt, dormit sei bläugen kann, un weck dat Gefäuhl hett, dat noch nich nauch Frünn' üm em rümmer sünd, de kann båbentau lihren, woans ein Fründschaften schluten kann. An'n 16. Oktober sünd Annie Heger un Yared Dibaba middags Klock 12 bi ein "Meet & Greet" mit ein lütt´ Läsung in't
NDR-Popup-Studio in Hamborg-Bardörp to beläwen.
Mihr tau dat Bauk, tau Annie Heger un Yared Dibaba is tau seihn in uns Magazin "De Noorden op Platt". Dor kriegen sei ok tau weiten: wo dat in Oostfreesland de besten Berliners gifft, woans sik ein Shantychor ut Prohn bi Stralsund bi dat Shantychor-Drapen in Zingst präsentiert hett un Frank Jakobs, de verklort uns woans dat in siene Heimat mit "Erntedank" so löppt - in sein Reech "Oostfreesland in echt".
In Mäkelborg-Vörpommern hett ein Bühn' Geburtsdach: 100 Johren Nedderdüütsch Bühn tau Wismer ward dor fieert un de Plappermoehl von NDR 1 Radio MV, de wier inlåd't. Un uns Plappermoellers hebben dorbi ein besünner Frau dråpen: 68 Johren is Lisa Kuß nu all dorbi, als Schauspälersch un Vörsittersch, un bi dat Jubiläumsstück an'n 18. Oktober steiht sei wedder up de Bühn. De "Heidi Kabel von Wismer" ward sei all nömt.
De Plappermoehl gifft dat in"t Internet wedder in ein XXL-Utgaf - mit ein Theoter-Rätsel tau'n Mitråden.
Väl Vergnäugen wünsch ik mit all de Rådio- un TV-Stücken up Platt, mit uns Texten un plattdüütsch Musik ut Hamborg, Sleswig-Holsteen, Neddersassen un Mäkelborg-Vörpommern,
Juch,
Thomas Naedler
30. September 2025
