Moin leve Lüüd,
dor stah ik an de rode Ampel un neven mi bremst en Lasten-E-Bike. Vörn sitt Modder, achtern twee Kinner. Ik kiek fründlich röver na de beiden un denn seggt de lütte Butscher to mi heel unvermodens, noch eenmal (tweemal?) slapen denn is Wiehnachten! Juchu! Un man süht em un sien grötere Süster direktemang de Vorfreud an. Man de Ampel jumpt op gröön un de Familie suust wull liekweg na Huus.
Un hier kummt nu de letzte Platt-Post vun't Jahr ahn Snee un ahn Sleden dorför avers mit mi, Lornz Lorenzen ut Lannesfunkhuus in Kiel.
Hebbt se nu al wedder toveel Geld för Geschenke för de Leefsten utgeven? Wenn ja, dor heff ik een Idee, de se nu glieks ümsetten kunnen. Denn uns plattdüütsche Schrievwettstriet "Vertell doch mal" vun NDR, Radio Bremen un Ohnsorg-Theoter is al los gahn un nu gifft dat wedder mehr as 5.000 Euro to winnen.
Dat Thema för 2026 is: "Kuddelmuddel".
Apropos. Dat gifft wull keen gröteret wiehnachtlich Kuddelmuddel as bi de Griswolds mit Chevy Chase in den Momang as he versöcht de Lichterkeden ünner Stroom to setten. Herrlich. De Fantasie sünd in den Schrievwettbewarf keen Grenz sett un för junge Lüüd ünner Achteihn gifft dat nee Rubriken.
Denn se köönt nu ok Handyvideos dreihn oder en Hörspeel opnehmen oder op anner Weg kreativ warrn. Dat Priesgeld för düsse jungen Lüüd wasst op eendusend Euro - un dor kann en Schoolklass oder Plattdüütsch-AG de mitmaken deit, düchtig afrümen.
Vun Stünn to Stünn warrn nu mehr wiehnachtliche Leder in't Radio speelt un as Redakteur, wat för de Sendereeg "Hör mal'n beten to" tostännig is, kann ik seggen, dükern se in uns
Podcast-Anbott rin. Uns Schrieverslüüd hebben sik en Barg an Geschichten utspekulert. So faat Werner Momsen an den 23. Dezember en hittet Ieesen an. He fraagt sik wat dat Rendeert Rudolf en He, en Se, oder nonbinär is? Marie Sophie Koop versöcht en heel besünneren Wunsch in de Realität ümtosetten un Matthias Stührwoldt sinneert doröver na, woans sik de Wiehnachtsdeko in´t Huus över de Tieden verännert hett.
Wiehnachtlich warrt dat ok bi "
De Noorden op Platt", de Sennen löppt an den 27. Dezember op NDR Fernsehen. Man wokeen nich so lang töven much, en Utkoppeln vun dat Stück leep al in't Schleswig-Holstein Magazin. Wunnerbest, woans mit Kolleeg Frank Goldenstein de Traditschoon vun't
plattdüütsch Krüffenspeel infungen hett.
Wenn ik an de lütte Jung torüch denk, de sik op'n Rüchsitz so op Wiehnachten freut - un natürlich ok op de Geschenke - fraag ik mi, woans wi ölleren, groten Lüüd uns ok dat neescherig, glücklich Funkeln in de Ogen bewohren könen?
Ik heff jüst in düssen Momang so en Geföhl, wenn ik jem schöne Wiehnachten wünschen do un bavento en goden Rutsch in't nie'e Johr.
Veel Vergnögen wünsch ik mit al de Radio- un TV-Stücken op Platt, mit unse Texte un Podcasts op Platt ut Hamborg, Sleswig-Holsteen, Neddersassen un Mäkelborg-Vörpommern.
Jemme,
Lornz Lorenzen
PS: Vun LünKI, unse lütte plattdüütsche KI schall ik ok gröten. Se warrt ok in't tokamen Johr düchtig twisseln un mit Hölp vun uns Redakschoon jümmers mehr Plattdüütsch lehrn. Dank ok an Jan Graf un Aurelie Herbelot, de se ünnerstütten doon.
23. Dezember 2025
