Moin, leve Plattsnackerinnen un Plattsnackers!
Wat för wunnerbore Geschichten, de Ji uns toschickt hebbt! Dorför seggt wi nochmal vun Harten Danke! Düssen Sünndag warrt dat nu spannend, denn bi uns grote "Vertell doch mal"-Gala in't Ohnsorg-Theater, dor warrt de Winnerinnen un Winners vun uns plattdüütsche Schrievakschoon künnig maakt. Vörmiddags Klock ölven geiht dat los. Un ok Ji köönt vun tohuus mit dorbi ween: op
ndr.de/platt hebbt wi en Live-Stream för Jo inricht. Klickt Jo an’n Sünndag geern mal rin!
Een heel besünnern Vörmiddag warrt dat. Nich blots, dat dor all de Winner-Geschichten vun wunnerbore Ohnsorg-Schauspelerinnen un -Schauspelers vördragen warrt, sünnern, kloor, dat gifft ok Musik op'e Ohren. Spelen un singen warrt de Country-, Rock- un Folk-Band Aalkreih ut Flensborg. Man dat is noch lang nich allens! Denn ok bi de Gala mit dorbi ween warrt uns "Vertell doch mal"-Botschafterin düt Johr: de TV-Moderatorin Enie van de Meiklokjes, de jüst nochmal bi de NDR-Fernsehsennen
DAS! op dat rode Sofa to Besöök weer. Modereert warrt de grote "Vertell doch mal"-Gala in’t Ohnsorg-Theater vun Yared Dibaba un Ilka Brüggemann.
Ik kann blots seggen: weest dorbi! Wi freit uns, wenn Ji inschalten doot!
Un nu veel Spaaß bi't Dörkieken vun düsse Utgaav vun de NDR Platt-Post!
Hartlich Gröten vun de Plattsnackerinnen un Plattsnackers vun'n NDR.
Jan Wulf (NDR Hamborg)
20. Juni 2025
